Hera apparati NASA tajribasidan soʻng asteroidning ilgari nomaʼlum tomonini koʻrsatdi
Yevropa zondi Didimning dastlabki batafsil suratlarini oldi va DART kosmik apparatining uning yoʻldoshi bilan toʻqnashuvi oqibatlarini oʻrganishga tayyorlanmoqda.

Yevropa kosmik agentligi (ESA) Hera apparati olgan Didim asteroid tizimining dastlabki yirik suratlarini taqdim etdi. Tasvirlardan birida diametri qariyb 780 metr boʻlgan asteroidning ilgari batafsil oʻrganilmagan tomoni koʻrinadi. Unda koʻplab kraterlar, xarsang toshlar va egatlar bor.
2022 yilda NASAning DART apparati asteroid yoʻldoshi — Dimorf bilan ataylab toʻqnashdi. Natijada uning Didim atrofida aylanish vaqti qariyb 33 daqiqaga qisqardi. Toʻqnashuv kosmosga katta miqdorda material ham otilib chiqishiga sabab boʻldi, uning bir qismi kattaroq asteroid yuzasigacha yetib borgan boʻlishi mumkin.
Hera missiyasi toʻqnashuv oqibatlarini oʻrganishi va olimlarga osmon jismlari harakatining oʻzgarish mexanizmlarini tushunishga yordam berishi kerak. Olingan maʼlumotlar asteroidlarni kinetik ogʻdirish usuli samaradorligini baholash va sayyoraviy himoya texnologiyalarini takomillashtirish imkonini beradi.
Har ikkala asteroidning batafsil suratlarini navbatdagi eʼlon qilish 2026 yil 25 noyabrga rejalashtirilgan.



