Ubisoft Microsoftʼdan Dishonored yaratuvchisi Arkane Lyonʼni sotib olishni taklif qildi — Bloomberg
Agentlik maʼlumotlariga koʻra, Ubisoft Arkane Lyon uchun daʼvogarlik qilayotgan bir nechta kompaniyadan biri boʻldi. Sotuv studiyani saqlab qolish va Marvelʼs Blade oʻyinini yakunlashga yordam berishi mumkin, biroq hozircha kelishuv yoʻq
Ubisoft Marvelʼs Blade ustida ishlayotgan, Dishonored va Deathloop oʻyinlari bilan tanilgan fransuz studiyasi Arkane Lyonʼni sotib olish boʻyicha taklif yubordi. Bu haqda Bloomberg muzokaralardan xabardor manbalarga tayanib xabar berdi.
Agentlik maʼlumotlariga koʻra, kamida uchta oʻyin kompaniyasi ariza topshirgan. Microsoft, shuningdek, studiyani uning rahbariyatiga sotish imkoniyatini ham koʻrib chiqmoqda. Hozircha hech bir taklif qabul qilinmagan.
Xboxʼdagi qisqartirishlar va qayta tuzilishlar fonida Arkane Lyonʼning kelajagi savol ostida qoldi. Microsoft jamoaning keyingi taqdiriga oid variantlarni izlamoqda. Dastlab noyabrga belgilangan qaror qabul qilish muddati dekabrgacha uzaytirildi.
Asosiy masalalardan biri Marvelʼs Blade boʻlib qolmoqda. Oʻyin 2023-yil dekabrida The Game Awards marosimida eʼlon qilingan, biroq shundan beri ishlab chiquvchilar yangi tafsilotlarni deyarli oshkor qilishmadi.
Bloomberg manbalarining baholashicha, loyiha yaqin bir-ikki yil ichida chiqishi mumkin. Bu rasmiy eʼlon qilingan reliz muddati emas, balki dastlabki prognoz. Studiyaning ehtimoliy sotilishi ham ishlab chiqish ishlari yakunlanishini hozircha kafolatlamaydi.
Gap aynan Fransiyadagi Arkane Lyon haqida ketmoqda. Uni Prey va Redfall oʻyinlarini ishlab chiqqan hamda Microsoft 2024-yilda yopgan AQShdagi Arkane Austin bilan adashtirmaslik kerak.
