SpaceX Boost Mobileʼni sotib olib, AQSh bozoriga chiqishni muhokama qilmoqda
SpaceX EchoStar bilan Boost Mobileʼni sotib olish yoki Starlink Mobileʼni AQShda kengaytirish boʻyicha boshqa kelishuvni muhokama qilmoqda. Muzokaralar yakuni hozircha nomaʼlum.
Boost Mobile — qariyb 7 mln abonentga ega EchoStar shoʻba operatori boʻlib, oʻzining 5G dasturiy infratuzilmasiga ega. Kompaniyaning AT&T va T-Mobile bilan virtual operator sifatida faoliyat yuritish boʻyicha kelishuvlari bor, biroq bu kelishuvlarning yangi egaga oʻtishi kafolatlanmagan va sud nizolariga olib kelishi mumkin.
SpaceX shaharlarda toʻlaqonli ishlashi uchun yetarli yer usti chastotalariga ega emas, AT&T, T-Mobile va Verizon esa unga MVNO modeli asosida oʻz tarmoqlaridan foydalanish imkonini berishga tayyor emas. Shu sababli kompaniya Starlink Mobile loyihasini rivojlantirmoqda: smartfonlarni toʻgʻridan-toʻgʻri ulash uchun sunʼiy yoʻldoshlardan foydalanishni rejalashtirmoqda va AQShdagi uyali aloqa minoralari joylashgan 80 mingta maydonga kirish imkonini olishga intilmoqda.
FCC SpaceXʼga smartfonlarga ulanish imkoniyatiga ega ikkinchi avlodga mansub 15 mingtagacha sunʼiy yoʻldoshni uchirishga ruxsat berdi. Ayni paytda T-Mobile rahbari Srini Gopalan sunʼiy yoʻldosh aloqasining istiqbollarini statsionar simsiz ulanishga nisbatan shubha bilan baholadi. EchoStar bilan kelishuvning mumkin boʻlgan shartlari va uning huquqiy oqibatlari hozircha aniqlanmagan.
