Google Pixel 11 Pro XL Pixel 10 Pro XL bilan taqqoslandi: €200 ortiqcha toʻlash kerakmi
Googleʼning yangi flagmani kuchliroq protsessor va ancha yaxshilangan avtonomlikka ega boʻldi, biroq aksariyat xususiyatlar unchalik katta oʻzgarishlarga uchramadi.
Pixel 11 Pro XLʼning ayrim internet-doʻkonlardagi narxi qariyb €1100 ni tashkil etadi, Pixel 10 Pro XLʼni esa taxminan €900 ga xarid qilish mumkin. Mutaxassislar narxlardagi farq oʻzini oqlash-oqlamasligini aniqlash uchun qurilmalarni taqqosladi.
Har ikki smartfon 120 Gts yangilanish chastotasiga ega 6,8 dyuymli OLED displeylar bilan jihozlangan va dizayni deyarli bir xil. Yangi modelning asosiy ustunligi — avtonomlik: sinovlarda u 16 soat 45 daqiqa ishladi, avvalgi model esa 12 soat 29 daqiqaga yetdi. Toʻliq quvvatlash vaqti ham 82 daqiqadan 60 daqiqagacha qisqardi.
Tensor G6 protsessori Tensor G5 bilan taqqoslaganda markaziy protsessor (CPU) unumdorligini 20 foizdan koʻproqqa oshirdi. Shu bilan birga, grafik unumdorlik deyarli oʻzgarmadi. Asosiy kamera va ultra keng burchakli modulda ham avvalgi sensorlar saqlanib qolgan. Besh karra optik zumga ega telefoto obyektivda kattaroq sensor paydo boʻldi, biroq suratlar sifati boʻyicha ustunlik unchalik katta boʻlmadi.
Umuman olganda, Pixel 11 Pro XL avtonomlik va hisoblash quvvatida sezilarli yaxshilanishlarni taklif etadi, biroq displey, grafika va kameralar sifati boʻyicha jiddiy sakrashni taʼminlamaydi. Shu sababli yangi avlod uchun ortiqcha toʻlov, avvalo, qurilmaning quvvatlamasdan uzoqroq ishlashi va protsessor unumdorligi muhim boʻlganlar uchun oʻzini oqlaydi.
