Zoom Sem Altman loyihasining koʻz toʻr pardasini skanerlash orqali biometrik verifikatsiyasini integratsiya qiladi
Videomuloqot xizmati haqiqiy insonlarni maxsus belgilar bilan koʻrsata boshlaydi
Videokonferensiyalar platformasi Zoom OpenAI hammuassisi Sem Altman yaratgan World loyihasining shaxsni tasdiqlash tizimini joriy qilmoqda. Haqiqiy inson ekanini isbotlagan foydalanuvchilar qoʻngʻiroq vaqtida maxsus koʻk belgi oladi. Korporativ mijozlar oʻz xohishiga koʻra qaysi uchrashuvlarda bunday biometrik tekshiruvdan oʻtish ulanishning majburiy sharti boʻlishini belgilashi mumkin.
Bain Capital va VanEck Funds kabi yirik moliyaviy tuzilmalar yangi texnologiyani allaqachon oʻzlashtira boshladi. Buning uchun investitsiya fondlari oʻz ofislarida xodimlarga koʻzning rangdor pardasini tezda skanerlash va tizimda roʻyxatdan oʻtishni yakunlash imkonini beruvchi Orb brendining maxsus qurilmalarini oʻrnatishni rejalashtirmoqda.
World IDʼda identifikatsiya uch bosqichli algoritmga asoslanadi: rasmiy hujjatlarni tekshirish, selfi yaratish va olingan suratni Orb skaneri orqali shakllantirilgan biometrik qolip bilan solishtirish. Ishlab chiquvchilar uchidan uchigacha shifrlash qoʻllanilishini va yagona maʼlumotlar bazasi mavjud emasligini taʼkidlashiga qaramay, tashabbus shaxsiy maʼlumotlarni himoya qilish boʻyicha ekspertlar oʻrtasida keskin munozaralarga sabab boʻlishda davom etmoqda. Xizmatning oʻzi blokcheyn asosida ishlaydi va erkin litsenziyalar ostida ochiq foydalanish uchun eʼlon qilingan.
