BBC «Xizmat vazifasi» serialining yettinchi mavsumidan ilk kadrlarni namoyish etdi
Martin Kompston, Viki Makklur va Edrian Danbar oʻz rollariga qaytadi. Davomining premyerasi 2027-yilda boʻlib oʻtadi.
BBC «Xizmat vazifasi» (Line of Duty) kriminal serialining yettinchi mavsumidan ilk kadrlarni taqdim etdi. Yangi olti qismni Jed Merkuryo yozdi va yaratdi, bosh rollar ijrosiga esa Martin Kompston, Viki Makklur va Edrian Danbar qaytishdi.
Syujetga koʻra, AC-12 boʻlinmasi tarqatib yuborilib, Kasbiy standartlar inspeksiyasiga aylantirilgan. Oʻzgarishlarga qaramay, Stiv Arnott, Keyt Fleming va Ted Xastings politsiyadagi korrupsiyani tergov qilishda davom etishadi. Bu safar ularga ayniqsa nozik ish topshiriladi.
Mavsumning asosiy yangi aktyorlaridan biri Robert Karlayl boʻladi. U maxsus taktik boʻlinmaning tajribali mergani — politsiyachi Shon Messini ijro etgan. Tom Ueston-Jons xizmat mavqeini suiisteʼmol qilishda ayblanayotgan inspektor Dominik Gof rolini oʻynaydi. Aktyorlar tarkibiga Laura Aykman, Levi Braun va Emi-Li Hikman ham qoʻshildi.
Mark Bonnar, Ouen Til, Perri Fitspatrik va Kristina Chong ham oʻz rollariga qaytadi.
Suratga olish ishlari Belfastda boʻlib oʻtdi va shu yil avvalroq yakunlandi. Olti qismdan iborat mavsumning premyerasi 2027-yilda BBC One telekanali va iPlayer striming platformasida boʻlib oʻtadi. Aniq sana hozircha eʼlon qilinmagan.
