HMD sunʼiy intellekt yordamchisiga ega 101 4G tugmali telefonini taqdim etadi
Yangi qurilma bulutli ilovalarni qoʻllab-quvvatlaydi, yetti kungacha ishlaydigan akkumulyator va chang hamda sachragan suvdan himoyaga ega boʻladi.
HMD kompaniyasi HMD 101 4G tugmali telefonini chiqarishga tayyorlamoqda. Qurilmaning asosiy xususiyatlaridan biri sunʼiy intellekt yordamchisi va bulutli ilovalarni qoʻllab-quvvatlashi boʻladi.
Qurilma 2 dyuymli LCD-displey va Unisoc T127 protsessori bilan jihozlanadi. Operatsion tizim sifatida MARCO OS ishlatiladi. Tezkor xotira hajmi 48 MB, ichki xotira hajmi esa 64 MB boʻladi. Xotirani hajmi 32 GBgacha boʻlgan microSD karta yordamida kengaytirish mumkin.
Qurilmaning avtonom ishlashini USB-C orqali quvvatlanadigan, sigʻimi 1200 mA·soat boʻlgan akkumulyator taʼminlaydi. Ishlab chiqaruvchi bayonotiga koʻra, bir marta quvvatlash yetti kungacha yetadi. Shuningdek, korpus IP52 standarti boʻyicha himoyalangan, FM-radio, ikkita LTE-modul, LED-fonar va 3,5 mm quloqchin uyasi mavjud.
HMD 101 4G qizil, toʻq koʻk va bej ranglarda chiqariladi. Qurilmaning narxi va sotuvlar boshlanadigan sana hozircha eʼlon qilinmagan.
