CD Projekt Red The Witcher 3 oʻyinida Geraltning asl ovozini saqlab qolish uchun sunʼiy intellektdan foydalanadi
Polshalik aktyor Yatsek Rozenek Geraltga yana ovoz beradi, neyron tarmoq esa uning oʻzgargan ovozini asl jarangiga yaqinlashtirishga yordam beradi.
CD Projekt Red The Witcher turkumidagi Riviyalik Geraltga ovoz beradigan polshalik aktyor Yatsek Rozenekning ovozini saqlab qolish uchun sunʼiy intellektdan foydalanishga qaror qildi. Texnologiya The Witcher 3 uchun tayyorlanayotgan Songs of the Past qoʻshimchasi ustidagi ishlar davomida qoʻllanadi.
2019-yilda Rozenek insultni boshdan kechirdi va shundan soʻng bir necha oy davomida gapira olmadi. Uzoq davom etgan reabilitatsiya tufayli aktyor nutqini tiklab, ishga qaytdi, biroq ovozi avvalgidan pastroq va xiraroq boʻlib qoldi.
Qahramonning yangi replikalari original oʻyindagi jarangga mos kelishi uchun CD Projekt Red sunʼiy intellekt yordamida ovoz klonlashga ixtisoslashgan Respeecher kompaniyasi bilan hamkorlik qilmoqda. Texnologiya Rozenekning The Witcher 3 oʻyinidagi qariyb 10 mingta replikasini tahlil qiladi va uning ovoziga xos avvalgi jihatlarni qayta yaratishga yordam beradi.
Shu bilan birga, qoʻshimcha uchun barcha yangi iboralarni aktyorning oʻzi yozib oladi. Rozenek bu qarorni qoʻllab-quvvatladi va Geralt rolini ijro etishda davom eta olishiga ishonch bildirdi.
CD Projekt Red kompaniyasining lokalizatsiya prodyuseri Mikolay Shved bu holatni sunʼiy intellektdan axloqiy foydalanishga misol deb atadi, chunki texnologiya ijrochining oʻz roziligi bilan qoʻllanmoqda.
