Yangi Huawei Enjoy 100 Pro 32 MP aniqlikdagi selfi-kameraga ega boʻladi

Huawei Enjoy 100 Pro 32 MP aniqlikdagi old kamera bilan jihozlanadi, deb xabar berdi iXBT ishlab chiqaruvchining tizeriga tayanib. 8 MP modul oʻrnatilgan Enjoy 90 Plus bilan taqqoslaganda, kamera aniqligi toʻrt baravar oshadi. Biroq suratlarning haqiqiy sifatini faqat testlar eʼlon qilingandan keyin baholash mumkin boʻladi.

Yangi qurilma Double Eleven chegirmalariga bagʻishlangan tadbirda 28-oktabr kuni taqdim etiladi. Enjoy turkumida Pro modeli Plus versiyasining oʻrnini egallaydi.

Eʼlon qilingan maʼlumotlarga koʻra, smartfon Kirin 8-seriyali protsessorga ega boʻladi. Chipning aniq nomi hozircha oshkor qilinmagan. Kompaniya, shuningdek, korpusning yiqilishlarga nisbatan chidamliligi oshirilganini bildirgan, biroq materialda sinov tafsilotlari keltirilmagan.

Tizerda koʻk rangli orqa paneli va gul naqshiga ega smartfon koʻrsatilgan. iXBT tavsifiga koʻra, uning orqa qismida 50 MP asosiy kamera va qoʻshimcha ultra keng burchakli modul joylashadi.

Huawei displey parametrlari, akkumulyator sigʻimi va narxini hozircha maʼlum qilmagan. Qolgan tafsilotlar taqdimotda eʼlon qilinishi kutilmoqda.