Rockstar GTA 6 ishlab chiqilishini yakunladi va navbatdagi loyihaga tayyorlanmoqda
Take-Two rahbari Strauss Zelnick oʻyin tayyorligini tasdiqladi va studiya keyingi rejalari haqida allaqachon oʻylayotganiga ishora qildi.
Rockstar Games Grand Theft Auto 6 oʻyinini ishlab chiqishni yakunladi. Bu haqda Take-Two Interactive rahbari Strauss Zelnick kompaniyaning moliyaviy natijalariga bagʻishlangan investorlar bilan uchrashuvda maʼlum qildi.
Rahbarning soʻzlariga koʻra, studiya oʻyin ustidagi ishlarni tugatgan va marketing kampaniyasini toʻliq tayyorlagan. Endi kompaniyaning asosiy vazifasi loyihaning texnik jihatdan tayyorligini taʼminlash va uni oʻyinchilarga muvaffaqiyatli taqdim etishdan iborat.
Zelnick GTA 6 chiqqanidan keyin Rockstarning keyingi rejalari haqida ham ishora qildi, biroq tafsilotlarni oshkor qilmadi. Ehtimoliy yoʻnalishlardan biri GTA Onlineʼni rivojlantirish boʻlib qolmoqda. Tarmoq rejimining amaldagi versiyasi kompaniyaga katta daromad keltirmoqda, shu bois uning davomi chiqishi ehtimoldan xoli emas.
Investorlar bilan muloqot chogʻida Zelnick GTA Online kelajagi haqidagi savollarga ham javob berdi. U yangi oʻyinda kontent yetishmasligidan xavotirda emasligini aytib, Grand Theft Auto olamida rivojlanish uchun hali koʻplab imkoniyatlar borligini taʼkidladi. Shu bilan birga, rahbar onlayn rejimning keyingi avlodi haqidagi aniq tafsilotlarni yana oshkor qilmadi.
