Yangi iPad mini oʻyinlarda sinovdan oʻtkazildi: quvvati yetarli, ammo ekran hamon 60 Gts
Engadget A20 Pro chipli iPad miniʼga 10 balldan 8,5 ball berdi. Planshet OLED-displeyi, unumdorligi va yaxshilangan ovozi uchun maqtaldi, asosiy kamchiliklari esa yuqori narx va yangilanish chastotasi oshirilgan ekran yoʻqligi deb baholandi.
Neytan Ingram yangi A20 Pro protsessorli iPad miniʼni sinovdan oʻtkazdi. Uning baholashicha, Apple ixcham planshetni sezilarli darajada yangilagan, biroq AQShda boshlangʻich narx 128 GB xotirali versiya uchun 699 dollargacha oshirilgan.
Asosiy yaxshilanishlardan biri diagonali 8,5 dyuym boʻlgan OLED-ekran boʻldi. Muallif chuqur qora rang va yanada ifodali tasvirni, ayniqsa qorongʻi sahnalarga ega filmlarni koʻrishda, alohida taʼkidladi. Shu bilan birga, yangilanish chastotasi 60 Gts darajasida qolgan — yangi qurilma iPad Proʻdagi 120 Gts displeylarning ravonligini taklif qilmaydi.
Sinovdan oʻtkazilgan planshet nanoteksturali shisha bilan jihozlangan. U yorqin yorugʻlikda yaltirashni sezilarli darajada kamaytirdi, biroq bu opsiya xaridning eng past narxini 899 dollargacha oshiradi: u 256 GB xotirali konfiguratsiyadan boshlab taqdim etiladi.
A20 Pro protsessorining unumdorligi Control va No Manʼs Sky oʻyinlari uchun yetarli boʻldi: sharhlovchining kuzatuvlariga koʻra, oʻyinlar sezilarli muammolarsiz ishlagan. Lightroom dasturida RAW-fotosuratlarga kiritilgan oʻzgarishlar deyarli bir zumda qoʻllangan. Biroq muallif protsessor va neyron blokining kuchliroq konfiguratsiyasiga ega 512 GB xotirali yuqori versiyani sinovdan oʻtkazgan. Sharhda quyi modellarga toʻgʻridan toʻgʻri taqqoslash keltirilmagan.
Material eʼlon qilingan paytda avtonom ishlash boʻyicha toʻliq sinov hali yakunlanmagan edi. Muallif besh kunlik foydalanish davomida, jumladan oʻyinlarda, yuqori yuklama ostida taxminan besh-olti soatlik ishlash vaqtiga ega boʻlgan. Video koʻrish va brauzerda ishlashda esa bu koʻrsatkich Apple vaʼda qilgan oʻn soatga yaqinlashgan. Control oʻyinini yarim soat oʻynash davomida quvvat 11 foiz bandiga kamaygan.
Tezkor quvvatlash ham alohida tekshirildi: 30 daqiqada akkumulyator quvvati 29 foizdan 74 foizgacha oshdi.
Sharhlovchi dinamiklarning yanada toʻyingan ovozini, shuningdek korpus qalinligi va massasining kamayganini ham maqtadi. Saqlanib qolgan cheklovlardan biri — Face ID yoʻqligi: qulfni ochish uchun quvvat tugmasiga oʻrnatilgan Touch ID ishlatiladi.
Muallifning fikricha, asosiy savol narx bilan bogʻliq. Yangi iPad mini ancha funksionalroq boʻlgan, biroq narxning oshishi uni torroq auditoriya uchun xaridga aylantiradi.
