Instagram YouTubeʼga daʼvogarlik qilmoqda: ijtimoiy tarmoq 90 daqiqagacha davom etadigan Features videolarini sinovdan oʻtkazmoqda
Braziliyadagi dastlabki sinovlardan soʻng formatni AQShdagi ayrim kontent yaratuvchilar ham sinay boshladi, biroq ommaviy ishga tushirish sanasi hozircha eʼlon qilinmadi.
Bunday videolar asosiy lenta va Explore tavsiyalarida koʻrsatiladi. Kontent yaratuvchilar Reelsʼga toʻliq versiyaga oʻtish imkonini beruvchi qisqa parchalarni joylashtirishi mumkin — masalan, tomoshabinlarni intervyu parchasidan butun soniga yoʻnaltirishadi. Xuddi shu yondashuvdan podkastlar uchun ham foydalanmoqchi.
Yangilik haqida Instagram rahbari Adam Mosseri va mahsulotlar boʻyicha vitse-prezident Tessa Lyons maʼlum qildi. Avvalroq Mosseri uzun videolarga qarshi chiqqan edi: uning fikricha, bunday videolar suratlar, qisqa postlar va doʻstlar bilan muloqotga ajratiladigan vaqtni qisqartirishi mumkin. Endi Instagram✴ auditoriyani toʻliq sonlarga olib kelish uchun qisqa videolardan foydalanmoqchi.
Bu formatni Instagram✴ for TV ilovasida ham tomosha qilish mumkin boʻladi. Iyun oyida ijtimoiy tarmoq Samsung televizorlarida gorizontal videolarni sinab koʻrgan; dastur Amazon Fire TV va Google TV qurilmalarida ishlaydi. Kompaniya uzoq davom etadigan videolar uchun smartfon emas, televizor ekrani koʻproq mos keladi, deb hisoblaydi. Shu bilan birga, servis bir nechta Reels roliklarini epizodlarga birlashtiradigan Series funksiyasini sinovdan oʻtkazmoqda va jonli efirlarni, jumladan boshlovchiga obuna boʻlmaganlar uchun ham, koʻzga koʻrinarliroq qilish yoʻllarini izlamoqda.
