Tesla elektromobil-pikapni ishlab chiqarishdan chiqarish rejalari ortidan Cybertruck ishlab chiqarishini 2027-yil yozining oxirigacha uzaytirdi
Ilon Mask bu qarorni toʻplanib qolgan buyurtmalarni bajarib tugatish zarurati bilan izohladi, garchi ishlab chiqarish quvvatlarini qayta taqsimlash rejalashtirilgan boʻlsa ham.
Tesla Cybertruck elektromobil-pikapini 2027-yil yozining oxirigacha ishlab chiqarishda davom etadi. Bu haqda kompaniya bosh direktori Ilon Mask X ijtimoiy tarmogʻida maʼlum qildi. Uning soʻzlariga koʻra, qoʻshimcha vaqt avtomobilga berilgan qolgan buyurtmalarni bajarish uchun kerak boʻladi.
Mask bu bayonotni Cybertruck ishlab chiqarishini taxminan 2027-yil oʻrtalarida toʻxtatish rejalari haqida maʼlum qilganidan besh kun oʻtib berdi. Kompaniya boʻshaydigan ishlab chiqarish quvvatlarini rul chambaragi boʻlmagan haydovchisiz Cybercab taksisini ishlab chiqarishga yoʻnaltirmoqchi edi. Tadbirkor pikapdan voz kechish sabablari qatorida uni ishlab chiqarish murakkabligini ham aytgan, biroq model foydali boʻlib qolayotganini taʼkidlagan.
Cybertruckʼning kelajagi haqidagi savol savdolarning sustligi fonida paydo boʻldi. 2019-yilda avtomobil taqdim etilganidan keyin Tesla har biri $100 turadigan oldindan berilgan buyurtmalar soni bir milliondan oshganini maʼlum qilgandi. Oʻshanda Mask yiliga 150 mingdan 250 mingtagacha avtomobil sotishni rejalashtirgan edi.
Biroq soʻnggi uch yil ichida kompaniya qariyb 76 mingta Cybertruck sotdi. Business Insider keltirgan Cox Automotive maʼlumotlariga koʻra, bu koʻrsatkichga 2025-yilda Maskning boshqa kompaniyasi — SpaceXʼga $131 mln qiymatidagi sotilgan avtomobillar ham kiradi. Tadbirkor avvalroq Tesla xaridorlarga depozitlarning bir qismini qaytarishiga toʻgʻri kelishini ham aytgandi.
