Golden Joystick Awards 2026: oʻyin mukofotining dastlabki gʻoliblari eʼlon qilindi
Londonda Golden Joystick Awards mukofotining 44-marosimi boʻlib oʻtdi. Unda eng yaxshi oʻyinlar va oʻyin industriyasidagi yutuqlar eʼtirof etildi.
Golden Joystick Awards 2026 oʻyin mukofotlari mavsumidagi ilk yirik tadbirlardan biriga aylandi. Bu yil bosh oʻyin nomi uchun kurash ayniqsa oldindan aytib boʻlmaydigan tus oldi: oʻtgan yili bosh favorit Clair Obscur: Expedition 33 boʻlgan boʻlsa, yangi relizlar orasida hozircha yaqqol yetakchi yoʻq.
Allaqachon eʼlon qilingan gʻoliblar qatorida eng yaxshi hikoya uchun mukofot olgan Dispatch, vizual dizayni uchun taqdirlangan Control Resonant va eng yaxshi koʻp oʻyinchili oʻyin nominatsiyasida gʻolib boʻlgan Meccha Chameleon bor. Eng yaxshi ovoz dizayni mukofoti esa Onimusha: Way of the Swordʼga nasib etdi.
Big Walk atrofidagi vaziyat ham alohida eʼtibor tortdi. House House ishlab chiquvchilari oʻyinni yaratishning yakuniy bosqichida generativ sunʼiy intellektdan foydalanganini tan oldi. Ularning aytishicha, bunday vositalar loyiha kodining 0,1 foizidan kamrogʻiga aloqador boʻlgan, biroq bu tan olish oʻyinchilar oʻrtasida bahs-munozaralarga sabab boʻldi.
Mukofot natijalariga Grand Theft Auto 6’ning yoʻqligi ham taʼsir koʻrsatdi: Rockstar Games oʻyini faqat 19 noyabrda chiqadi va ovoz berishda qatnashmadi. Shu bilan birga, oldinda hali The Game Awards marosimi bor, u yerda daʼvogarlar oʻrtasidagi kuchlar nisbati oʻzgarishi mumkin.
Ultimate Game of the Year bosh mukofotiga nomzodlar qatorida Dispatch, Control Resonant, Crimson Desert, Resident Evil Requiem, Pragmata va boshqa kutilayotgan loyihalar bor.
