GTA 6 hali chiqmasidan oldin PS Storeʼda 11 ta maksimal baho oldi

PlayStation Store maʼlumotlar bazasida Grand Theft Auto 6 uchun qoʻyilgan dastlabki baholar aniqlandi. Sonyʼning raqamli doʻkoni backendidagi maʼlumotlarga koʻra, oʻyin maksimal — 5 dan 5 yulduzli reytingni foydalanuvchilarning 11 ta bahosi asosida olgan. Biroq loyiha sahifasida bu maʼlumotlar hozircha koʻrsatilmagan.

PlayStation Store oʻyinlarni faqat ularni sotib olgan va ishga tushirgan foydalanuvchilarga baholash imkonini bergani sababli, reytingning paydo boʻlishi GTA 6’ga kimlar allaqachon kirish huquqiga ega boʻlgani haqida savollar tugʻdirdi. Mumkin boʻlgan nomzodlar qatorida sharhlar uchun nusxalarni olganlar hamda Rockstar Gamesʼning oʻyin ishlashini doʻkon infratuzilmasi orqali tekshirayotgan testchilari tilga olinmoqda.

Bu baholar GTA 6’ning Metacriticʼdagi kelajakdagi natijasi bilan bogʻliq boʻlishi mumkinligi ham alohida eʼtibor tortdi. Hozircha rekord 99 ball bilan The Legend of Zelda: Ocarina of Timeʼga tegishli. GTA 4 98 ball olgan, Red Dead Redemption 2 esa eng yuqori baholangan oʻyinlar qatoriga kiradi.

Shunga qaramay, GTA 6’ning kelajakdagi baholari haqida xulosa qilishga hali erta. Bundan tashqari, PS Storeʼdagi foydalanuvchilar reytingi professional nashrlar sharhlari asosida hisoblanadigan Metacritic oʻrtacha baliga taʼsir qilmaydi.