Lamborghini Gallardoʻni qayta ishlash deyarli bir million yevroga tushadi

CAVËN atelyesi birinchi avlod Lamborghini Gallardoʻning qayta talqin qilingan versiyasi — Hommage 26’ni taqdim etdi. Dizaynni Fabrizio Giugiaro GFG Style studiyasi bilan birgalikda ishlab chiqdi. U 1990-yillarning oxirida dastlabki qiyofasini yaratishda ishtirok etgan avtomobilga yana qaytdi.

Ishlab chiqarish 25 dona bilan cheklanadi. Donor avtomobil hisobga olinmaganda, qayta ishlash narxi 900 ming yevrodan boshlanadi. Xaridor oʻz Gallardoʻsini taqdim etishi yoki atelyega mos nusxani topishni topshirishi mumkin.

Hommage 26 uglerod tolali kompozit materialdan foydalanilgan yangi kuzovga ega boʻldi. Dizaynerlar old va orqa qismlar, havo kirish kanallari hamda aerodinamik elementlarni qayta ishladilar. Oʻziga xos jihatlar qatorida ikkita faol yon qanotga ega kuzovga oʻrnatilgan orqa spoyler va salonning ochiladigan orqa oynasi bor. Bu yechim dvigatel ovozini yaxshiroq eshitish imkonini beradi.

Texnik qayta ishlash uchun Italtecnica javob beradi. Atmosferali 5,0 litrli V10 dvigatel 8500 aylanish/min gacha ishlay oladi. GT versiyasi uchun 540 ot kuchi, Performance versiyasi uchun esa 560 ot kuchi koʻrsatilgan. Dvigatel ochiq kulisali olti pogʻonali mexanik uzatmalar qutisi bilan birlashtirilgan.

Osma tizim amortizatorlarni elektron boshqarish tizimi hamda Comfort va Sport rejimlari bilan jihozlangan. Shuningdek, modernizatsiya qilingan tormozlar va maxsus 20 dyuymli gʻildiraklar ham koʻzda tutilgan.

Salonda yangi oʻrindiqlar va asboblar panelining oʻzgartirilgan bezagi paydo boʻldi. Shunday qilib, loyiha Gallardoʻning faqat tashqi koʻrinishinigina qamrab olmaydi: buyurtmachilarga atmosferali dvigatel va uzatmalarni qoʻlda almashtirish imkoniyatini saqlab qolgan kompleks qayta ishlash taklif etiladi.