Microsoft Fallout, Doom, Diablo va Minecraftʼni Xbox eksklyuzivlariga aylantirmoqchi
Mumkin boʻlgan oʻzgarish konsol versiyalariga taalluqli: soʻrov maʼlumotlariga koʻra, kompyuter uchun relizlar saqlanib qoladi
Microsoft Xbox Insider dasturi ishtirokchilari uchun oʻtkazilgan soʻrovnomaga oʻz franshizalarining barcha kelajakdagi oʻyinlarini faqat Xbox uchun chiqarishga oʻtish haqidagi savolni kiritdi. Savol matnida Call of Duty bundan mustasno ekani koʻrsatilgan.
Foydalanuvchilardan Fallout, The Elder Scrolls, Doom, Diablo, Physint va Minecraft Xbox eksklyuzivlariga aylansa, bunday yondashuv konsol tanloviga taʼsir qiladimi, deb soʻraldi. Shu bilan birga, boshqa platformalarda allaqachon chiqarilgan loyihalar qoʻllab-quvvatlashdan mahrum boʻlishi mumkin.
Soʻrovnomaning oʻzi Microsoftʼning yakuniy qarorini tasdiqlamaydi. U faqat Xbox rahbariyati qaysi yoʻnalishni koʻrib chiqayotganini koʻrsatadi. Avvalroq kompaniya oʻzining yirik oʻyinlarini raqib konsollarida ham chiqargan edi, biroq Clockwork Revolution va Gears of War: E-Day Xbox konsollarining eksklyuzivlariga aylandi.
