Ishlab chiquvchi proxy zanjirlarini qoʻllab-quvvatlaydigan Nextlink Android-mijozini taqdim etdi

Nextlinkʼning asosiy xususiyati — proxy zanjirlarini bevosita ilova interfeysida yaratish imkoniyati. Foydalanuvchilar bir nechta serverni birlashtirishi, ularning tartibini oʻzgartirishi va XHTTP hamda Hysteria2 kabi protokollarni uygʻunlashtirishi mumkin. Masalan, ulanishni Germaniya va Niderlandiyadagi serverlar orqali qurish mumkin.

Mijoz Xray, sing-box va AmneziaWGʻni, konfiguratsiyalar va obunalarni import qilishni, ayrim ilovalar uchun marshrutlashni, DNS va IPv6’ni sozlashni, shuningdek, ulanishlar statistikasi va jurnallarini koʻrishni qoʻllab-quvvatlaydi. Qoʻshimcha funksiyalar qatorida foydalanuvchi mavzulari muharriri ham bor — unda interfeys bezagini import va eksport qilish mumkin.

Ishlab chiquvchi graceful switch mexanizmini ham qoʻshdi: server almashtirilganda, ilova yangisi oʻrnatilguniga qadar avvalgi ulanishni saqlab qolishga harakat qiladi. Bu almashtirish muvaffaqiyatsiz boʻlganida VPNʼning butunlay uzilib qolish xavfini kamaytirish imkonini beradi.

Nextlink ikki tahrirda tarqatiladi: Originalʼda tarmoq komponentlari alohida yuklanadi, Shadowʼda esa ular ichki oʻrnatilgan. APK hajmi mos ravishda qariyb 21 va 67 MiBni tashkil etadi. Hozircha buildlar Android ARM64 qurilmalari uchun mavjud.

Loyiha MIT litsenziyasi asosida ochiq dastlabki kod bilan tarqatiladi. Ilova oʻz VPN-serverlarini taqdim etmaydi va obunalarni sotmaydi — undan foydalanish uchun foydalanuvchi konfiguratsiyalari yoki mos keluvchi xizmatlar kerak boʻladi.

Nextlinkʼning ilk ommaviy beta-versiyasi GitHubʼda mavjud. Ishlab chiquvchi ilova hozircha sinov bosqichida ekanidan ogohlantiradi hamda foydalanuvchilarni xatolar haqida xabar berish va takomillashtirish boʻyicha takliflar yuborishga chaqiradi.