Rimac bor-yoʻgʻi 71 ta giperkar sotilgach, Nevera ishlab chiqarishini toʻxtatadi

Ishlab chiqarish toʻxtatilishi haqida Road & Track Germaniyaning Auto Motor und Sport nashriga tayanib xabar berdi. Hisobotga koʻra, rejalashtirilgan 150 ta bazaviy Neveraʼdan 50 tasi, 40 ta Nevera Rʼdan esa 20 tasi yigʻilgan.

Har ikki versiya bir necha rekord oʻrnatgan. Ular orasida dunyodagi eng tez seriyali avtomobil unvoni, Nyurburgringning «Shimoliy halqasi»da elektromobil uchun avvalgi rekord vaqt va chorak mil masofani 7,9 soniyadan kam vaqtda bosib oʻtish bor.

Shu bilan birga, elektr giperkarlar umuman olganda xaridor topishda qiynalmoqda. Avval Nevera bilan Evija modeli orqali raqobatlashgan Lotus keyinchalik V8 dvigatelli gibrid superkarga oʻtdi. Rimac kompaniyasining sobiq aksiyadori Porsche ham oʻz elektr giperkarini yaratishni koʻrib chiqdi, biroq oxir-oqibat ichki yonuv dvigatelli superkarni tanladi.

Ishlab chiqarish hajmi kichik boʻlishiga qaramay, Nevera Rimac maqomini oshirdi. Kompaniya asoschisi Mate Rimac hozir Bugatti kompaniyasiga toʻliq rahbarlik qilmoqda, Rimac Technology esa Porsche 911 Turbo Sʼni ham oʻz ichiga olgan avtomobillar uchun elektr kuch uzatish tizimlarini yetkazib bermoqda. Ishlab chiqarilgan avtomobillar elektr texnologiyalari va brend uchun sezilarli bosqich boʻldi.