Geely va Renault yangi Lotus superkari uchun quvvati 986 ot kuchidan yuqori boʻlgan gibrid V8 dvigatelni taqdim etdi
Yangi Horse W40 kuch qurilmasi quvvati 670 ot kuchidan yuqori va aylantiruvchi momenti 800 N·m boʻlgan benzinli dvigatel asosida yaratilgan. Ogʻirligi atigi 200 kg boʻlgan dvigatel Hot-Vee komponovkasiga ega: unda turbokompressorlar silindrlar qatori orasiga joylashtirilgan. Bu agregatning oʻlchamlarini kichraytirish imkonini berdi.
Lotus Type 135 gibrid tizimi tarkibida dvigatel elektr motori bilan birga ishlaydi, umumiy quvvat esa 986 ot kuchidan oshadi. Transmissiya moy vannasida ishlaydigan ikkita ilashish muftasiga ega, sakkiz pogʻonali robotlashtirilgan 8LDCT uzatmalar qutisi bilan jihozlanadi. U 1050 N·m gacha boʻlgan aylantiruvchi momentga moʻljallangan.
Superkarning premyerasi 2028 yilda kutilmoqda. Model Lotus Emira bilan bogʻliq boʻlmagan mutlaqo yangi dizaynga ega boʻladi. Elektr dvigatelli Eletre va EMEYAʼdan farqli oʻlaroq, yangi modelni Yevropada ishlab chiqarish rejalashtirilmoqda.
Horse Power nashri, shuningdek, dvigateldan nafaqat superkarlarda foydalanish mumkinligini qayd etadi. Past aylanishlarda yuqori aylantiruvchi momentga ega boʻlgani sababli, u yoʻltanlamaslar va pikaplar uchun mos keladi. Ushbu kuch qurilmasiga ega boshqa modellar kelajakda paydo boʻlishi mumkin.
