Yamaha NMAXʼni elektrlashtirdi: yangi skuter 104 kmgacha yuradi
EICMA koʻrgazmasida 3,5 kVt·soat sigʻimli akkumulyatorga ega Yamaha NMAX E taqdim etildi. Uni uy rozetkasidan yoki Type 2 ulagichli jamoat quvvatlash stansiyasidan quvvatlash mumkin.
Yamaha MAX oilasini toʻldirgan NMAX E elektr skuterini taqdim etdi. Yangilik shahar ichidagi qatnovlar uchun moʻljallangan boʻlib, 125 sm³ hajmli benzin dvigatelli skuterlarga qiyoslanadigan sinfga kiradi.
Model tasmali uzatmali eAxle elektr yuritmasi bilan jihozlangan. Nominal quvvati 6,7 kVt, maksimal quvvati 7,5 kVt, aylantiruvchi momenti esa 33,3 N·m ga yetadi.
Sigʻimi 3,5 kVt·soat boʻlgan litiy-ion akkumulyator korpus ichiga oʻrnatilgan va kundalik quvvatlash vaqtida uni yechib olish koʻzda tutilmagan. Eʼlon qilingan yurish zaxirasi akkumulyator harorati 25 °C boʻlganida WMTC Class 1 sikli boʻyicha 104 kmgacha yetadi. Amaldagi masofa harakatlanish sharoitlariga bogʻliq boʻladi.
Quvvatni toʻldirish uchun maishiy rozetka yoki Type 2 ulagichli oʻzgaruvchan tokda ishlaydigan jamoat quvvatlash stansiyasidan foydalanish mumkin. Toʻliq quvvatlash taxminan 5,5 soat davom etadi.
Haydovchiga uchta harakatlanish rejimi taklif etiladi: sport rejimidagi S, silliqroq harakatlanish uchun T va tejamkor E. Jihozlar qatoriga ABS, gʻildiraklarning sirpanishiga qarshi tizim hamda LED optikasi kiradi.
Yangi Yamaha elektr skuterlari, jumladan NMAX E, 2027-yil bahorida sotuvga chiqarilishi rejalashtirilgan.
