Geekbenchʼda 9000 mA·soat sigʻimli akkumulyatorga ega Honor 700 Pro aniqlandi
Hali taqdim etilmagan Honor smartfoni Snapdragon 8 Gen 5 protsessori va 16 GB tezkor xotira bilan sinovdan oʻtkazildi.
Geekbench benchmarki bazasida FAP-AN00 katalog raqamiga ega nomaʼlum Honor smartfoni aniqlandi. Gizmochina maʼlumotlariga koʻra, qurilma Honor 700 seriyasiga mansub boʻlib, ehtimol, seriyaning yuqori darajadagi modeli — Honor 700 Pro hisoblanadi.
Sinov natijalariga koʻra, smartfon Qualcomm Snapdragon 8 Gen 5 (SM8845) protsessori asosida ishlaydi, Android 17 operatsion tizimida boshqariladi va 16 GB tezkor xotira bilan jihozlangan. Avvalroq insayder Digital Chat Station Honor 700 seriyasi ikki xil protsessor variantini olishi haqida xabar bergan edi: Snapdragon 8s Gen 4 va Snapdragon 8 Gen 5.
Honor 700 Pro 1,5K aniqlikdagi 6,57 dyuymli yassi OLED-displey, 200 MP asosiy kamera va 50 megapikselli periskopik telefotoobyektiv bilan jihozlanishi kutilmoqda. Akkumulyator sigʻimi 9000 mA·soatni tashkil etadi — ishlab chiqaruvchi bu xususiyatni allaqachon tasdiqlagan.
Honor 700 Pro uchta konfiguratsiyada taqdim etiladi: 12/256, 12/512 va 16/512 GB. Honor 700 va Honor 700S bazaviy modellari ham kiradigan butun seriyaning taqdimoti Xitoyda 13 noyabrga rejalashtirilgan.
