Google Android va Play Storeʼni yangiladi: Wallet va Quick Shareʼda yangi funksiyalar paydo boʻldi
Googleʼning noyabr oyidagi yangilanishlari Google Wallet, fayllarni zaxiralash va parollarni boshqarish uchun yangi imkoniyatlarni qoʻshdi.
Google Android tizim xizmatlari va Play Store ilovalar doʻkonining noyabr oyidagi yangilanishlarini chiqardi. Oʻzgarishlar smartfonlar, planshetlar, avtomobillar, televizorlar, Wear OS qurilmalari va kompyuterlarga taalluqli.
Google Play servicesʼning 26.44-versiyasida Google Walletʼga Matter bilan mos keladigan xususiy uylar uchun Aliro raqamli kalitlarini qoʻshish imkoniyati paydo boʻldi. Shuningdek, xizmat Traveler QR — sayyohlik QR-kodlarini qoʻllab-quvvatlay boshladi. Ishlab chiquvchilar uchun qurilmadan foydalanuvchining yosh toifasini aniqlash imkonini beradigan API qoʻshildi.
26.43-versiya yangilanishi Android smartfonlaridagi fotosurat va videolarni Quick Share orqali Windows kompyuterlariga avtomatik zaxiralash funksiyasini olib keldi. Bundan tashqari, Google Password Manager endi mos keladigan hisob maʼlumotlarini import qilishda parollar va kirish kalitlarini qoʻlda tanlash imkonini beradi.
Oʻzgarishlar Google Play Storeʼga ham taalluqli. Doʻkonning 54.0-versiyasida ayrim tadbirlar sahifalarida kontekstga mos maslahatlar, shuningdek, Play Games Services uchun yangilanishlar paydo boʻldi. Doʻkonning avvalgi versiyasida Google oʻyinlar sahifalariga oʻyin jarayoni haqida qisqacha maʼlumotni, sharhlarni va hamjamiyat faolligini qoʻshgan edi.
Kompaniya oʻzgarishlar roʻyxatida funksiyaning paydo boʻlishi uning darhol barcha foydalanuvchilar uchun mavjud boʻlishini anglatmasligini taʼkidlaydi. Ayrim yangiliklar bosqichma-bosqich tarqatiladi va qurilmalarda bir necha oy oʻtib paydo boʻlishi mumkin.
