200 MP kamerali Motorola Signature 27 noyabrda chiqadi
Flagman Snapdragon 8 Elite Extreme Gen 6 chipiga ega boʻladi va Android uchun yettita yangilanish oladi. Uning ovoz tizimini esa Bang & Olufsen mutaxassislari tayyorlagan.
Motorola Signature 27 modelini noyabrda chiqarishga hozirlik koʻrmoqda. Kompaniya Hindiston uchun chiqish muddatini tasdiqladi, AQSh saytida ham noyabr oyi koʻrsatilgan eʼlon paydo boʻldi. Smartfon ilk bor sentyabr oyida Snapdragon Summit tadbirida namoyish etilgan.
Modelning asosiy xususiyatlaridan biri — 200 MP aniqlikdagi periskop telekamerasi. U 100× gacha kattalashtirish va tasvirni generativ sunʼiy intellekt yordamida qayta ishlash imkonini beruvchi Super Zoom Pro funksiyasini qoʻllab-quvvatlaydi. Gap yuz karra optik zum haqida emas, raqamli kattalashtirish haqida bormoqda. Asosiy kamera Sony LYTIA 910 sensoridan foydalanadi va uning aniqligi 50 MP.
Qurilmaning ishlash unumdorligini Snapdragon 8 Elite Extreme Gen 6 taʼminlaydi. Issiqlikni chiqarish uchun ArcticMesh tizimi qoʻllanadi. U tarkibida olmos zarrachalari boʻlgan termogel, suyuq metall, mis toʻr va bugʻlanish kamerasini birlashtiradi. Ishlab chiqaruvchining fikricha, bunday konstruksiya uzoq davom etadigan oʻyinlar, video tasvirga olish va sunʼiy intellekt funksiyalaridan foydalanish vaqtida yordam berishi kerak.
Signature 27, shuningdek, Bang & Olufsen bilan hamkorlik doirasida yaratilgan Audio by B&O audio tizimiga ega ilk Motorola smartfoni boʻladi. Uning dizaynida alyuminiy, keramika elementlari va mato teksturasiga ega qoplama ishlatilgan.
