Meta 2027 yilda Quest 2 operatsion tizimi yangilanishlarini toʻxtatadi
Meta 2027 yil martigacha Quest 2 va Quest Pro uchun operatsion tizimning soʻnggi yangilanishini chiqarishni rejalashtirmoqda. v213 versiyasi soʻnggi yangilanish boʻladi, biroq xavfsizlik yamoqlari yil oxirigacha chiqarib boriladi.
Meta Quest 2 va Quest Pro VR garnituralari uchun yangi funksiyalarni ishlab chiqishni yakunlashini maʼlum qildi. Operatsion tizimning soʻnggi yirik yangilanishi 2027 yil martigacha barcha qurilmalarga yetib borishi kerak.
Shundan soʻng kompaniya xavfsizlik va muhim xatolarni tuzatish uchun yangilanishlarni 2027 yil dekabrigacha, shu jumladan, chiqarishda davom etadi. Ishlab chiquvchilar ham shu muddatgacha ushbu garnituralarni qoʻllab-quvvatlaydigan yangi ilovalarni taqdim etishlari mumkin boʻladi.
Funksional yangilanishlarning yakunlanishi qurilmalar darhol oʻchirib qoʻyilishini anglatmaydi. Mos keladigan oʻyinlar va ilovalar, shuningdek, Link orqali kompyuterga ulanish ham ishlashda davom etadi. Biroq tizimning yangi imkoniyatlari asta-sekin zamonaviyroq modellarga moʻljallanadi.
Meta endi Quest 3 va Quest 3Sʼni oʻzining oʻyinlar uchun VR platformasining asosiy qurilmalari deb atamoqda. Kompaniya maʼlumotiga koʻra, ular ishlab chiquvchilarga koʻproq hisoblash resurslari va aralash reallik uchun ichki imkoniyatlarni taqdim etadi.
Bu eʼlon 2027 yil bahoriga rejalashtirilgan Meta VR Glasses qurilmalarining chiqarilishidan oldin qilindi. Yangi qurilmalar Quest 3 va Quest 3S uchun yaratilgan ilovalarni ularga koʻchirish imkonini beradigan xuddi shu operatsion tizim va ishlab chiqish vositalaridan foydalanadi.
Quest 2 va Quest Pro 2024 yilda ishlab chiqarishdan chiqarilgan, biroq Meta maʼlumotlariga koʻra, ulardan hanuz millionlab odamlar foydalanmoqda.
