«Kuchliroq qaytaman». Faker — T1ning BLGdan magʻlubiyati va Worlds 2026dan chiqishi haqida
T1 sardori va midleyneri Li San Hyeok (Faker) Bilibili Gaming yarim finalga yaxshiroq tayyorlanganini tan oldi. Jamoasi 1:3 hisobida yutqazdi.
Magʻlubiyatdan soʻng Faker oʻyin T1 rejasi boʻyicha kechmaganini aytdi. Shunga qaramay, jamoa birgalikda ajoyib oʻyin koʻrsatganini va bundan mamnunligini taʼkidladi. Uning soʻzlariga koʻra, raqib seriyaga yaxshiroq tayyorlangan.
Kibersportchi oʻtgan mavsumni ham turlicha baholash mumkin boʻlgan mavsum sifatida taʼrifladi. Uning aytishicha, jamoa nafaqat natijalar, balki oʻyin jarayoni bilan bogʻliq koʻplab masalalarni ham hal qilmay qoldirgan. Shu bilan birga, Faker mavsumni na eng yaxshi, na toʻliq muvaffaqiyatsiz deb hisoblaydi.
«Bu tajribadan saboq olishga, kamchiliklarimni tuzatishga, kuchliroq qaytishga va muxlislarga yaxshiroq oʻyin koʻrsatishga harakat qilaman», — dedi u.
Magʻlubiyat T1ning jahon chempionatlari pley-offida Xitoy jamoalariga qarshi magʻlubiyatsiz 13 yillik seriyasiga yakun yasadi. Faker ishtirokidagi tarkib ham toʻrt yil ichida ilk bor grand finalda oʻynamaydi va turnirni uchinchi-toʻrtinchi oʻrinlarda yakunlaydi.
Worlds 2026ning hal qiluvchi uchrashuvida Bilibili Gaming Gen.G Esports bilan toʻqnash keladi. Final 14 noyabr kuni Bruklin, Nyu-York shahrida oʻtkazilishi rejalashtirilgan.
