SOS tugmasiga ega Nokia 2360 Flip tugmali telefoni
HMD bolalar va keksalar uchun moʻljallangan Nokia 2360 Flip — qopqoqli tugmali telefonni taqdim etdi. Qarindoshlar Family Assist orqali uni smartfondan sozlashi mumkin, bunda maʼlumotlar internet tarifisiz SMS orqali almashiladi.
Telefon faqat 2G tarmoqlarida ishlaydi. Android va iOS uchun ilova orqali kontaktlar qoʻshish, eslatmalar oʻrnatish, ovoz balandligini oʻzgartirish va SOS funksiyasini boshqarish mumkin. Sozlamalar Family PIN kodi bilan himoyalangan, shu sababli ularni oʻzgartirish uchun ilova shart emas.
SOS tugmasi uch soniya bosib turilganda, Nokia 2360 Flip belgilangan raqamga qoʻngʻiroq qiladi va beshta favqulodda aloqa kontaktiga xabar yuboradi. «Maktab» rejimida faqat soat va favqulodda qoʻngʻiroqlar qoladi, kiruvchi qoʻngʻiroqlar va SMSlarni esa ruxsat etilgan kontaktlar roʻyxati bilan cheklash mumkin. Kamerani, oʻyinlarni va boshqa funksiyalarni alohida bloklashga ham ruxsat beriladi.
Telefonda menyu belgilari yirik boʻlgan asosiy displey, tashqi ekran, karnay orqali gaplashish funksiyasi va HAC2011 standarti boʻyicha eshitish apparatlarini qoʻllab-quvvatlash mavjud. Yechiladigan akkumulyator 15 kungacha ishlash yoki 27,5 soat suhbatlashish imkonini beradi. Model koʻmir-qora, bordo-qizil va feruza ranglarda chiqariladi. Qurilmaning narxi hozircha oshkor qilinmagan.
