Samsung One UI 9.5 yangilanishida Bixbyʼni toʻlaqonli AI yordamchisiga aylantiradi
Yangilangan Bixby kundalik vazifalarni jadval asosida mustaqil bajarishi va ularning bajarilishini kuzatib borishi mumkin boʻladi.
Samsung Bixby ovozli yordamchisining sunʼiy intellekt imkoniyatlarini kengaytirishga qaratilgan yirik yangilanishni tayyorlamoqda. SamMobile manbasi sizdirilgan maʼlumotlarga tayanib xabar berishicha, One UI 9.5’da u kundalik vazifalarni fon rejimida mustaqil bajara oladi.
Masalan, foydalanuvchilar valyuta kursi haqidagi maʼlumotlarni har kuni olishni sozlashlari mumkin boʻladi. Misol tariqasida dollar kursini Hindiston rupiyasiga nisbatan har tong avtomatik tekshirish keltirilgan. Sozlamadan keyin Bixby vazifa yaratilganini tasdiqlashni taklif qiladi va bu vazifa ilovaning maxsus Actions boʻlimida paydo boʻladi.
Foydalanuvchilar bunday vazifalarni boshqarishi: ularni mahkamlab qoʻyishi, vaqtincha toʻxtatishi yoki oʻchirishi mumkin boʻladi. Shuningdek, vazifalar bajarilishini kuzatish va ular yaratilgan dastlabki dialogga qaytish imkonini beruvchi faollik jurnali ham boʻladi.
Hozirda bu funksiya ichki sinovdan oʻtkazilmoqda. U One UI 9.5 asosida ishlaydigan Galaxy S27 smartfonlari seriyasi bilan birga taqdim etilishi kutilmoqda.
