Instagramda sunʼiy intellekt orqali yoshni aniqlash funksiyasi dunyoga yoyilmoqda
Meta Instagramda yoshni tekshirishni global miqyosda kengaytirmoqda: millionlab oʻsmirlar tugʻilgan sanasini notoʻgʻri koʻrsatgan boʻlsa ham, avtomatik ravishda Teen Account sozlamalariga oʻtkaziladi.
Tizim foydalanuvchining 18 yoshdan kichik ekanini taxmin qilish imkonini beruvchi belgilarni tahlil qiladi. Bular qatoriga foydalanuvchi muloqot qiladigan profillar va kontent turlari, tugʻilgan kun tabriklari, shuningdek, fotosurat va videolardagi umumiy mavzular hamda vizual xususiyatlar, jumladan, boʻy va suyak tuzilishi kiradi. Avstraliyada Meta qoʻshimcha ravishda Appleʼning yosh signalidan foydalanishni boshladi.
Tizim 13 yoshdan kichik deb hisoblagan foydalanuvchilar Instagramdan oʻchiriladi — bu Meta akkauntlari uchun eng kichik yosh chegarasi. 13–17 yoshli foydalanuvchilarda, roʻyxatdan oʻtishda katta yoshni koʻrsatsa ham, Teen Accounts avtomatik ravishda yoqiladi. Bunday akkauntlar sukut boʻyicha yopiq boʻladi, oʻsmirlar uchun ochiq kontentni cheklaydi va notanish odamlarga ularga shaxsiy xabar yuborish imkonini bermaydi.
Ota-onalar va vasiylar Teen Accountsʼni nazorat qilishi, vaqt cheklovlarini oʻrnatishi va Instagramdan foydalanishni kuzatishi mumkin. 16 yosh yoki undan kichik foydalanuvchilar kattalarning ruxsatisiz bunday akkaunt sozlamalarini mustaqil oʻzgartira olmaydi. AQShda ota-onalar kelasi oydan Instagramda yoshni baholash tizimi ishlayotgani va platformada oʻsmirning yoshi toʻgʻri koʻrsatilganini qanday tekshirish mumkinligi haqida bildirishnomalar ola boshlaydi.
Kengaytirish avgust oyida 17,1 milliard dollarlik daʼvoni hal qilish ortidan amalga oshirildi: oʻshanda Meta yoshni tekshirish amaliyotlari va oʻsmirlar uchun cheklovlarni kuchaytirishga rozi boʻlgan. Kompaniya may oyida AQShdagi akkauntlar uchun ishga tushirilgan Facebookʼdagi yoshni avtomatik tekshirish boshqa hududlarda ham mavjud boʻladimi-yoʻqmi, maʼlum qilmadi.
