GDC soʻrovi: oʻyin ishlab chiquvchilarning uchdan biri soʻnggi ikki yilda ishdan boʻshatilishga duch kelgan
Ishdan boʻshatilgan mutaxassislarning yarmidan koʻpi hanuz yangi ish topa olmagan, ishlab chiquvchilarning 65 foizi esa kasbiy faoliyati tufayli ruhiy salomatligi yomonlashganini bildirgan.
Game Developers Conference (GDC) konferensiyasi tashkilotchilari turli mamlakatlardan oʻyin industriyasining 2600 dan ortiq mutaxassisi javoblari asosida tayyorlangan State of the Game Industry hisobotining 15-nashrini eʼlon qildi.
Tadqiqotga koʻra, soʻnggi ikki yilda soʻrov ishtirokchilarining 34 foizi ishdan boʻshatilishga duch kelgan, AQShda esa bu koʻrsatkich 39 foizga yetgan. Ishini yoʻqotganlarning yarmidan koʻpi (54 foiz) hozircha ishga joylasha olmagan.
Soʻrovda qatnashganlarning 40 foizi generativ sunʼiy intellekt vositalaridan foydalanadi — bu bir yil avvalgidan 4 foiz bandga koʻp. Texnologiyadan eng koʻp gʻoyalar ishlab chiqishda (73 foiz), maʼlumotlarni tahlil qilishda (62 foiz) va kod generatsiyasida (56 foiz) foydalaniladi.
Ishlab chiqishning asosiy platformasi boʻlib kompyuter qolmoqda: respondentlarning 81 foizi unga yoʻnalgan. Konsollar orasida 45 foiz koʻrsatkich bilan PlayStation 5 yetakchi, undan keyin Xbox Series X/S (37 foiz) turadi. Eng ommabop oʻyin dvigatellari Unreal Engine (35 foiz) va Unity (28 foiz) boʻldi.
Tadqiqot mehnat sharoitlari bilan bogʻliq muammolarni ham aniqladi. Ishlab chiquvchilarning 86 foizi yil davomida hech boʻlmaganda bir marta haftasiga 40 soatdan koʻproq ishlagan, 65 foizi esa kasbiy faoliyati ruhiy salomatligiga salbiy taʼsir koʻrsatganini bildirgan. AQShlik ishtirokchilarning 80 foizi kasaba uyushmalarini tuzishni qoʻllab-quvvatlaydi.
