«Paranormal Activity» asosidagi oʻyin Steamʼda bepul chiqdi
The Mortuary Assistant yaratuvchisi bekor qilingan Paranormal Activity: Threshold asosidagi bepul qoʻrqinchli oʻyin — Playable Archiveʼni chiqardi. Qisqa hikoyani taxminan bir soatda yakunlash mumkin.
«Paranormal Activity» asosidagi oʻyin oʻzgargan koʻrinishda boʻlsa-da, baribir oʻyinchilarga yetib bordi. Paranormal Activity: Threshold bekor qilinganidan soʻng, ishlab chiquvchi Brayan Klark va DreadXP nashriyoti loyihaning bir qismini saqlab qolib, uni Playable Archive nomi ostida chiqardi. Reliz 26 oktabrda boʻlib oʻtdi, oʻyin Steamʼda bepul taqdim etilgan.
IGN xabariga koʻra, dastlabki ishlab chiqish jarayonini Paramount joriy yil boshida toʻxtatgan. The Mortuary Assistant oʻyini bilan tanilgan Klark shundan keyin loyihani butunlay yopib qoʻyishiga toʻgʻri keladi, deb oʻylaganini aytdi. Biroq DreadXP allaqachon yaratilgan materialni nashr etishni taklif qildi. Ishlab chiquvchi zarur oʻzgarishlarni kiritib, taqdim etiladigan versiyani takomillashtirdi, ammo kontentning katta qismini chiqarib tashlashga toʻgʻri keldi.
Voqealar markazida uyini taʼmirlash paytida sirli buyum topib olgan Yangi Angliyadagi juftlik turadi. Shundan soʻng qahramonlarning odatiy hayoti tushunib boʻlmaydigan voqealar ketma-ketligiga almashadi. Hikoya topib olingan videoyozuvlar orqali bayon qilinadi, oʻyinchilar esa okkult ramzlar, jinlar bilan bogʻliq marosimlar va marhumlar bilan muloqotga duch keladi.
Butun hikoya anonim manbadan olingan arxiv koʻrinishida taqdim etilgan. Uning mazmunini ehtiyotkorlik bilan oʻrganish tavsiya qilinadi — bu gʻayritabiiy hodisalarni tergov qilish atrofida qurilgan oʻyinning qorongʻi uslubining bir qismidir.
Oʻyinni yakunlash uchun 30–60 daqiqa kerak boʻladi. Saqlash imkoniyati yoʻq, shu bois hikoyani bir seansda tugatish kerak. Steamʼda faqat inglizcha versiya koʻrsatilgan — unda ovozli ijro, interfeys va subtitrlar mavjud.
Playable Archive bekor qilingan loyihaning saqlanib qolgan qismi bilan tanishish imkonini beradi. Bu muallif va nashriyotning bajarilgan ishga ikkinchi imkoniyat berish haqidagi qarori tufayli chiqarilgan, mustaqil qisqa qoʻrqinchli oʻyin.
